Nire Ararteko

NIRE GOGOKOENAK NIRE GAIAK NIRE PROFILA SAIOA ITXI
  • Arartekoak Bizkaiko Foru Aldundiko Ogasun Sailari eskatu dio ken dezala edozein izapide egiteko nahitaez aurretik hitzordua eskatu behar izatea, eta sistema hori borondatezko aukera gisa jar dezala

    Herritar bati galarazi egin zioten errenta-aitorpenarekin lotutako izapide bat egitea, aurretik hitzordurik eskatu ez zuelako. Gainera, ez zuen erantzunik jaso hasieran egin zuen erreklamazioaren gainean. 

    Arartekoaren ustez, aurretiazko nahitaezko hitzordua ezartzea ez dago justifikatuta interes orokorrari dagokionez, ez da oinarri juridiko argietan oinarritzen eta mugatu egin dezake herritarrek administrazioarekin aurrez aurre harremanak izateko duten eskubidea. 

    Horregatik, erakunde honek gomendio bat bidali dio Bizkaiko Foru Aldundiko Ogasun eta Finantza Sailari, ez dezan ezarri aurretiazko nahitaezko hitzordua edozein izapide aurrez aurre egiteko, batez ere administrazio-erregistroaren funtzioarekin lotutakoak.

    Arartekoak gomendatzen du aurretiko hitzorduaren sistema aukerakoa izan dadin eta horren eskuragarritasunari buruzko informazio publikoa eman dadin, sistema hori aholkularitza espezializatua behar duten izapideetarako erabiliko dela bermatuz, baina zerbitzu publikoetara aurrez aurre joatea oztopatu gabe. Neurri horren bidez, berdintasunaren, hurbiltasunaren eta zerbitzu publiko onaren printzipioak betetzea bermatu nahi da.

    EBAZPENA

    Vitoria-Gasteiz, 2024ko abenduaren 4a

    Ikusi gehiago
  • Arartekoak Ingurumenari buruzko Biltzar Nazionalean parte hartu du

    Manuel Lezertua arartekoak Ingurumenari buruzko Biltzar Nazionaleko (CONAMA 2024) saio teknikoan esku hartu du, mugitzeko eskubidea bermatzeko hiri-estrategiak direla eta. “Mugikortasuna eztabaidan: mugikortasunaren kontzeptutik mugitzeko eskubidera” izenburuko eztabaida-mahaia izan du ardatz nagusi bere hitzaldiak eta, bertan, agerian jarri ditu hiri-mugikortasun jasangarrirako eskubidea babesteko esparrua eta botere publikoek hori sustatzeko dituzten betebeharrak. 

    Bere aurkezpenean, Lezertuak nabarmendu du garrantzitsua dela mugikortasun jasangarriari heltzea, ez bakarrik araudiaren ikuspegitik, baizik eta baita ere herritarren eguneroko bizipenetik. Esan duenez,"gai horrek kezkatzen nau eta axola dit, ararteko nahiz herritar gisa, eta batzuetan, txirrindulari gisa".

    Arartekoak Euskadin emisio gutxiko eremuen erregulazioa hobetzeko gomendio orokorreko ondorio nagusiak partekatu ditu, erakundeak arlo horretan egin duen ekarpen nagusietako bat baita. Ahalegin hori Arartekoak antolatutako foro baten bidez osatu zen, non hainbat erakunde, aditu eta herritarrek elkarrekin eztabaidatu baitzituzten Euskadin mugikortasun jasangarriak dituen erronkak eta aukerak.

    Lezertuak azpimarratu du herritarren parte-hartzeak funtsezko zeregina duela mugikortasun jasangarrirako estrategia eraginkorrak eta ekitatiboak eraikitzen, mugikortasun jasangarrirako eta garraiobideak aske aukeratzeko eskubidea babesten aurrera egiteko. Eskubide horiek Eusko Legebiltzarrak 2023. urtean onartutako Mugikortasun Jasangarriaren Legean jasota daude. 

    Era berean, azaldu du mugikortasun jasangarrirako eskubideak paradigma-aldaketa dakarrela berekin: mugitzeko eskubidetik mugitzeko askatasunera -horretarako norberari gehien komeni zaion modua aukeratuz- eta gizartearen eta ingurumenaren ikuspuntutik pertsonak modu jasangarrian mugitzea sustatzeko eskubidera. 

    Ingurumenari buruzko Biltzar Nazionala bi urtean behin egiten da eta erreferentea da Espainiako ingurumenaren jasangarritasunaren eremuan. Arartekoaren parte-hartzeak indartu egiten du Euskadik mugikortasun-politika publiko jasangarriak, inklusiboak eta herritarren ongizatean oinarritutakoak garatzeko duen konpromisoa.

    ARARTEKOAREN INTERBENTZIOA

    Vitoria-Gasteiz, 2024ko abenduaren 4a

    Ikusi gehiago
  • Arartekoaren erakunde-adierazpena, Desgaitasuna duten Pertsonen Eskubideen Nazioarteko Eguna dela eta
    2024ko abenduaren 3a Egun honetan, gizarte bidezkoagoa eta barneratzaileagoa eraikitzeko dugun konpromisoa berresten dugu, non denek beren eskubideak berdintasunez baliatu eta beren potentziala garatu ahal izango duten
    Ikusi gehiago
  • Arartekoak gaitzetsi egiten du Pasai Antxoko krimen matxista

    Arartekoak samin eta atsekabe handiz gaitzesten du Leonorren kontrako erailketa matxista, haren bikote ohiak tiroka bizia kendu baitzion ostiralean, Pasai Antxoko bere bizilekuan. 

    Matxismoaren ondoriozko krimen honek azalpenak eskatzen dizkigu gizarte gisa, eta kasu hori eta horren inguruabarrak zorrotz berrikustea eskatzen digu erakunde guztioi, honako hau ulertzeko: zergatik, Leonorrek salaketak egin arren, ezin izan duten emakume hori babestu eta ezin izan duten galarazi orain urte batzuk salatu zuen erasotzaileak azkenean bera hiltzea.  

    Arartekoak bat egiten du Leonorren seme-alaben, senideen eta lagunen saminarekin. Haiek, hemendik aurrera, erakundeek eman diezaieketen laguntza guztia jaso beharko dute, batez ere krimen horrek beren bizitzetan sortutako kaltea ahal den neurrian konpontzeko.

    Erakunde honek jendaurrean salatzen du, berriro ere, matxismo hiltzaileak eragin guztiz kaltegarria izaten jarraitzen duela emakumeen bizitzetan, eta euskal gizarte osoari eta bere erakundeei eskatzen die irmoki konprometitu daitezela egiturazko gaitz horren kontra eta ideologia eta balio matxisten kontra borrokatzen, hiltzen duen indarkeriaren azken kausa baita. 

    Arartekoak bide horretan lanean jarraituko du, sendo eta modu nekaezinean, matxismoaren adierazpen guztiak salatzen eta emakumeen eta umeen giza eskubideak babesteko duen konpromisoa egunero berritzen, emakumeen eta gizonen berdintasunaren alde.

    Vitoria-Gasteiz, 2024ko abenduaren 2a

    Ikusi gehiago
  • Arartekoak Justizia Sailari iradoki dio alda dezala Espetxeak Kudeatzeko Eskuliburua, Euskadiko espetxe guztietarako irizpide bateratua ezar dadin
    Arartekoaren proposamen horrek kexa batean du jatorria. Erdi-askatasuneko erregimenean zeuden bi atzerritar, hirugarren sektoreko erakunde bateko baliabideen erabiltzaileak, kexu ziren Bizkaiko espetxean hirugarren graduan sailkatutako atzerritarren edo baldintzapean askatutakoen identifikazio-dokumentazioa atxikitzeko prozedurengatik.
    Ikusi gehiago
  • Arabako Batzar Nagusietan agerraldia

    Manuel Lezertua arartekoa Arabako Batzar Nagusietako Berdintasun, Euskara eta Gobernantza Batzordearen aurrean agertu da, Elkarrekin Araba-Podemos/Ezker Anitza-IU/Berdeak Equo/Alianza Verde y EH Bildu batzarkide-taldeek egindako eskaerari jarraituz, aurretiko hitzorduaren funtzionamendu egokia azaltzeko.

    AGERRALDIA  

    Vitoria-Gasteiz, 2024ko azaroaren 21a

    Ikusi gehiago
  • Azaroak 21: arreta zuzeneko hiru bulegoen itxiera
    Antolaketa arrazoiak direla eta, 2024ko azaroaren 21ean, osteguna, itxita egongo dira herritarrei arreta zuzeneko bulegoak.
    Ikusi gehiago
  • Arartekoak Plentziako Udalari gomendatu dio aparkatzeko sistema arautuaren udal zerbitzua berrikus dezala, udalerri horretan erroldatutakoei eta oporretako egoiliarrei ematen dien tratamendu desberdinari dagokionez

    Plentziako oporretako egoiliar batzuek Ararteko adierazi zioten ez zeudela ados aparkatzeko sistema arautuaren alderdi batzuekin.

    Haien iritziz, araudiak tratu-desberdina ematen die alde batetik, Plentzian ibilgailua erregistratuta duten eta bertan erroldatuta daudenei, eta bestetik, udalerri horretan bigarren etxebizitza duten eta erroldatu gabe daudenei, beren ibilgailuak han erroldatuta ez dituztenei.

    Kexagileek uste dute udalak tratu desberdina ematen diela bertan erroldatutakoei eta araudi hori ezartzen den garaian (uztailaren 1etik irailaren 8ra) udalerri horretan egoten diren erroldatu gabeko egoiliarrei. Era berean, adierazten dute udalak udalerriaren erdigunean ia aparkatzeko aukerarik gabe utzi duela talde hori, aparkalekuak bertakoentzat bakarrik gordetzen direlako.

    Bestalde, Metroan dagoen aparkalekua bertakoentzat bakarrik dela diote, eta Gorlizeko, Barrikako eta Lemoizko bizilagunek ezin dutela erabili, nahiz eta autobus-zerbitzua eskasa izan eta gaueko 10etan bukatu. Portuari dagokionez, bi orduko muga duten (eremu urdina) lau aparkaleku sortu omen dituzte, baina denbora hori ez omen da nahikoa aparkatzeko, deskargatzeko eta itsasora irteteko.

    Azkenik, udalaren atzealdean dagoen lurzati bat aipatu dute. Beraien esanean, Foru Aldundiaren jabetzakoa da eta bertakoek soilik erabiltzeko eremutzat kalifikatu da.

    Udalari informazioa eskatu ondoren, hark txosten bat igorri zion Arartekoari. Bertan adierazi zuen ez zela egia bisitariek aparkatzeko aukerarik ez zutenik; errepikatu zuen udako hilabeteetan arazoak sortzen zaizkiela udalerrian 12 hilabetez bizi direnei, bertan lan egiten dutenei edo mugikortasun urriko txartela dutenei; eta berriz aipatu zuen berdintasun printzipioa ezin dela ezarri ekitate printzipioa kontuan hartu gabe.

    Arartekoaren aburuz, honako helburu hau dute aparkaldi mugatuko sistemen araudietan ezartzen diren egoiliar-araubideek: egoiliarrek beren bizilekutik gertu aparkatu ahal izatea, sistema horiek ezartzen dituzten eragozpenak izan gabe. Informazio-eskaeran gogoeta hori helarazi arren, udalak ez du horretaz ezer adierazi. 

    Erakunde honek uste du udalaren azalpenek ez dutela justifikatzen egoiliar talde bati eta besteari ematen zaien tratu desberdina, neurri horren helburua kontuan hartuta. 

    Horregatik, Plentziako Udalari gomendatu dio zerbitzu hori berrikus dezala, bertan erroldatutakoei eta oporretako egoiliarrei ematen dien tratu desberdinari dagokionez.

    EBAZPENA

    Vitoria-Gasteiz, 2024ko azaroaren 12a
     

    Ikusi gehiago
Ararteko logo
Vitoria-Gasteiz
Ararteko

Herriaren Defendatzaileen Koordinaziorako XXXVII. Jardunaldiak

Defentsa-erakundeen lana administrazio onerako eskubidea sustatzeko
 

Imanol Pradales lehendakariak eta Bakartxo Tejería Eusko Legebiltzarreko lehendakariak, Ángel Gabilondo herriaren defendatzailearekin eta Manuel Lezertua arartekoarekin batera, gaur goizean hasi dituzte, Gasteizko Villa Suso jauregian, Herriaren Defendatzaileen Koordinaziorako XXXVII. Jardunaldiak, Arartekoak antolatuak.

Bere hitzaldian, Angel Gabilondo Herriaren Defendatzileak honako hau esan du: "Administrazio ona funtsezkoa da bizikidetza demokratikorako, erakundeekiko konfiantzarako, eta herritarren bizitzari eragiten dieten gaiei arreta emateko eta, hala badagokio, horiek ebazteko". 

Manuel Lezertua arartekoak berriz, honela definitu du administrazio ona: “administrazio publikoei beren eginkizunak eta eskumenak betetzean arreta handiz jokatzeko ezartzen zaien betebeharra”. Horrela, Lezertuak adierazi du administrazioak jarduten duenean, ezin duela alde batera utzi herritarrenganako hurbiltasunaren printzipioa, jokoan dagoenak eragin zuzena duelako botere publikoa erabiltzearen legitimitatearen pertzepzioan. Esan duenez, “arretaz, gardentasunez eta eraginkortasunez jokatzen duen administrazio-sistema bat beharrezkotzat, fidagarriagotzat, bidezkoagotzat eta legitimoagotzat hartzen dute herritarrek”. 

Arartekoaren esanean, “eskubideak defendatzeko erakundeok lanean jarraitu behar dugu, administrazio ona izateko eskubidea defendatzeko, herritarren eta administrazio publikoen arteko harremanetan bermeak hobetzeko egiten dugun lanaren zati gisa”. Eta azpimarratu du: “ibilbide horretan, defendatzaileak laguntzaile bezala, bitartekari bezala ikusi behar dituzte administrazioek, helburu komun hau lortzeko: gure herritarrei zerbitzu publikorik onena eta bidezkoena ematea”. 

Inaugurazioaren ondoren, mintzaldiak hasi dira, José Martín Europar Batasuneko Auzitegiko epailearen eta Juli Ponce Bartzelonako Unibertsitateko Administrazio Zuzenbideko katedradunaren ponentziekin. 

Egunean barrena, zenbait defentsa-erakundetako ordezkarien eskutik, lehen mahai-inguruan hizpide izango da administrazio onerako eskubidea, administrazio-prozesuaren esparruan. Gero, Rafael Jiménezen sarrerako ponentziaren ostean  Ramón Llull Unibertsitateko Konstituzio Zuzenbideko katedraduna bera , beste mahai-inguru batean eztabaidatuko da “administrazio ona herritarrekiko harremanetan”, eskubide sozialetan duen eragina nabarmenduz. 

Bihar, asteazkena, mahai-inguru bat izango da, eta bertan Gianluca Esposito Europako Kontseiluko Giza Eskubideen eta Zuzenbide Estatuaren zuzendari nagusiak hartuko du parte. 

Jardunaldiei amaiera emateko, bihar 12:30etan, herriaren defendatzaileen adierazpen programatikoa ezagutzera emango dute defendatzaileek.

Vitoria-Gasteiz, 2024ko urriaren 29a

Prentsa eta komunikazioa
Jardunaldiak eta hausnartzeko foroak
Prentsa oharrak
Administrazio publikoak