Oztopoak eta jardunbide egokiak energia-kontsumitzaile ahulen parte-hartzea bermatzeko Euskadiko tokiko energia-komunitateetan
Arartekoak antolatutako jardunaldia
Ararteko erakundeak jardunaldi hau bultzatzen du, energia-pobreziaren Europako astean, bereziki aztertu nahi baitu zer mekanismok ahalbidetu behar dieten administrazio publikoei nahiz gizarte-erakundeei energia-pobreziako egoerak hobeto integratzea eta kudeatzea, autokontsumoaren bitartez.
Tokiko energia komunitateak (TEK) energia kontsumitzaileen erakundeak dira, iturri berriztagarrietatik datorren argindarraren autokontsumoa sustatzeko sortuak. Autokontsumo hori kolektiboki egiten da, tokiko bazkideen bidez. Aukera bikaina dira energia berriztagarriek herrietan harrera handiagoa izateko eta herritar guztiek energia-trantsizioan hobeto parte hartzeko.
Testuinguru horretan, botere publikoek kontuan hartu behar dute TEKek ahalmen handia dutela argindarraren faktura murrizteko eta familien energia-mendekotasuna arintzeko, bereziki kontsumitzaile-talderik ahulenena.
Jardunaldia otsailaren 21ean, astelehena, egingo da Bilbon (Bizkaia Aretoa - EHU), aurrez aurre eta online.